ފަހެ، ދަންނާށެވެ! ދިވެހި ރައްޔިތުންތިބީ، ރައީސް މައުމޫނުގެ ވެރިކަމާ ވަރަށްބޮޑަށް ނުރުހިފައެވެ. ނަފްރަތުކަން އުފެދިފައެވެ. އެންމެބޮޑު ސަބަބަކީ، ވެރިކަމުގައި މާގިނަދުވަސް ވުމެވެ. މީސްތަކުން ހިތުގެއަޑިން ނަފްރަތު ކުރާލެއް ކުޑައެއްނޫނެވެ. މަޑުންތިއްބަސް ވަރަށް ބޮޑެވެ. އެހެނަސް އެކަން އަމަލުން ފާޅުކުރުމުގެ ހިތްވަރު އަދި ނެތީއެވެ. މާއްދީގޮތުން ލިބެމުންދާ ފައިދާތަކެއްގެ ސަބަބުން ދެއަތަށް ކިރިލަކިރިލާ ތިބެން ޖެހިފައިވާ ބަޔަކު އެބަތިއްބެވެ. ދިރިހުރުމަށް، އާންމުދަނީ ލިބޭނޭއެހެން ގޮތްތަކެއް ފެނިފައި ނެތުމުން މަޖްބޫރުވާ ބަޔަކުވެސް އެބަ ތިއްބެވެ. ފަހެ، ރައްޔިތުންނަށް މިވީ ތިރީސް އަހަރުދުވަހު ދަސްކޮށްދީ، ކަށީގައި ހިއްޕުވާފައިވަނީ، ގަނޑުވަރާއި ބޮޑުންގެގާތަށް ހިނގާއި ސަލާންޖަހާށެވެ. އާދޭސް ދަންނަވާށެވެ. އަމިއްލަ ހައްގުތަކެއް ވާކަން، ދަސްކޮށްދީފައެއް ނެތެވެ. މިއީ މިސްރުން ރައީސް މައުމޫނު ދަސްކުރައްވާ ފައިވާ ފިރްޢައުނީ ދަރުސެކެވެ. ފިލާވަޅެކެވެ. ފަހެ، މިއީ ދުރާލައިގެން ވަރަށްކުރީއްސުރެ ވިސްނާއި ހޭއަރާތިބެގެން، ވެރިކަމުގެ ފަރާތުން ސިއްރުގޮތެއްގައި ރާވައިގެން ކޮށްފައިވާ ކަމެކެވެ. ޑޮކްޓަރ ޒާހިރު ހުސައިނާއި އަލްއުސްތާޒު ފަތްހުއްﷲ ޖަމީލުގެ އެހީތެރިކަމުގައި ކޮށްފައިވާ ބޮޑު ޖަރީމާއެކެވެ. ތިންލައްކައިގެ ރައްޔިތަކަށް ދައްކާފައިވާ ގިލަންހުރި އަހުވައެކެވެ.
ދިވެހިރާއްޖޭން މިފެންނަނީ، ދުނިޔެމަތީގެ އެންމެ ގަދީމީ ދުވަސްވަރަށް ވާރުތަކުރާ، ވަރަށް ޖާހިލުކަން ބޮޑު، ވެރިކަން ކުރުމުގެ ވަށްތަރެކެވެ. ޖާހިލިއްޔަތާ ސީދާކޮށް ގުޅުންހުރި ރައްޔިތުން ބައިބަޔަށް ބައިތިއްބައި ގެން ވެރިކަން ހިންގުމުގެ ނިޒާމު ދިވެހި ރާއްޖެއަށް، ވާރުތަކޮށް ފައިވަނީ، މިޞްރުންނެވެ. މިއީ ވަރަށް ގަދީމީ އަދި އަނިޔާވެރިކޮށް ވެރިކަންކުރުމުގެ ސަގާފަތެކެވެ. އަޒްހަރު ޔުނިވަރސިޓީގެ ޢިލްމުވެރިންގެ އަތްމައްޗަށް ރާއްޖޭގެ ވެރިކަން، ދިވެހި ރައްޔިތުން ދޫކޮށްލީ، ވަރަށް އުފަލާއެކު ހިތްހަމަޖެހިގެން ތިބެއެވެ. ޢިލްމުވެރި ދަންނަބޭކަލުން ތަކަކަށް ވާތީއެވެ. ބަނގުރާ ބޯމީހާއާއި ވިއްކާމީހާއާ ގުދަންކޮށް ގެންގުޅޭ މީހާއާ އެއްވަރުކަމަށް ފަތްވާދެއްވާފައި ވާތީއެވެ. ރައީސް މައުމޫނުފަދަ ދަންނަބޭކަލެއް ވެރިކަމަށް ގެނެސްގެން، ފޮނިފޮނި އުންމީދުތަކެއް ހާސިލު ކުރުމުގެ ބޭނުމުގައެވެ. ރާއްޖޭގެ ވެރިކަމުގައި އޮތް، އިސްލާމް ދީނާދުރު އަނދިރި ކަމަކުން، ގަދަ އަލިކަމަކަށް ބަދަލުކޮށް ލުމުގެ ބޭނުމުގައެވެ. އަޒުހަރު ޔުނިވަރސިޓީން އިސްލާމީ ޝަރީޢަތް އަރަބިބަހުން، އުގެނިގެން ތިއްބެވި ބޭފުޅުން ކޮޅެއްގެ އަތްމަތިން ފެނިގެންދާނެ ތަހުޒީބީ ވެރިކަމުގެ ނިޒާމެއް، ބޭނުންތެރި ވިލެއް ބޮޑު ކަމުންނެވެ. ލާމަރްކަޒީ އުސޫލުން ބާރުތައް ބަހާލައިގެން، އެއްބައެއް ވަންތަކަމުގެ ހަރުދަނާ އުޚުއްވަތްތެރި ނިޒާމެއް ހިންގާނެ ވެރިކަމުގެ ސިޔާސަތެއްގެ ބޭނުމުގައެވެ. ފަހެ، މިއީ ހަގީގަތެވެ. އޭރު ދިވެހި ރައްޔިތުން، ރައީސް މައުމޫނު ބަލައިގަތް ގޮތެވެ. ކަންތައް މިހެންއޮތަސް، ވެރިކަމުގެ ބާރުގައި 28 އަހަރުވީ އިރުވެސް އަޒުހަރުގެ ގްރެޖުއޭޓުންނަށް ދެއްކިފައިވަނީ، ރައްޔިތުން ބައިބަޔަށް، އަޅާއި ބަހާލައިގެން ވެރިކަން ކުރުމުގެ އެންމެ ޖާހިލީ ވަށްތަރެވެ.
ފަހެ ދަންނާށެވެ! ދިވެހި ރާއްޖޭގެ ސިޔާސީ މުފައްކިރުންގެ ވިސްނުން މިދުވަސްވަރުގައި ހުއްޓިފައިވަނީ، އެއް އަމާޒަކަށެވެ. އެއް ޓާގެޓަކަށެވެ. ގާނޫނު އަސާސީގައި ލިޔުމަށް ނިންމާފައިވާ އިންތިގާލީ މަރްހަލާ، ނުވަތަ “އިންތިގާލީ ބާބު” އަސާސީގައި ލިޔެވިގެންދާނެ ގޮތަކާމެދުގައެވެ. 2008 ފެބްރުއަރީ 14 ވި ބުރާސްފަތި ދުވަހުއޮތް ބޮޑުމަޖިލީހުގެ 253 ވަނަ ޖަލްސާގައި ނެގުނު ވޯޓަކީ، ރާއްޖޭގެ ސިޔާސީ މަސްރަހަށް ވިސްނާކޮންމެ ދިވެހި ދަރިއަކު މުތޯލިއާކުރުން ލާޒިމުނަތީޖާ އެކެވެ. ދުވަހު ނޫސްތަކުން، ޚާއްސަކޮށް މިނިވަން ނޫހުން މިމައުލޫމާތުތައް ފުރިހަމަކޮށް ލިބޭނެކަމުގެ އުންމީދު ކުރަމެވެ. ހަމައިން ނެއްޓޭފަހަރު އަޔަސް، ގިނަފަހަރު އެނޫހަކީ، ރަނގަޅު އެއްޗެކެވެ. ގާނޫނު އަސާސީގެ “ރައީސުލް ޖުމްހޫރިއްޔާގެ ބާބު” ގެ 10 ވަނަ މާއްދާގެ (ދ) ބޭރުގައުމު ތަކަށާއި ބައިނަލް އަގްވާމީ ޖަމާއަތްތަކަށް، ސަފީރުން އައްޔަންކުރުމުގެ ބާރު، ރައީސުލް ޖުމްހޫރިއްޔާއަށް ޚާއްސަކޮށްފައި ބޭއްވުމުގެ މަގްސަދުގައި އެމާއްދާ ޑްރާފްޓް ކުރެވިފައި އޮތްގޮތްވަނީ ފެއިލްކޮށް ލާފައެވެ. މިއީ މިހާރުމިއޮތް ސަރުކާރު ރައީސް މައުމޫނުގެ އުމުރަށް ދެމެހެއްޓުމަށް ބޮޑުމަޖިލީހުގައި ސިޔާސީ އޮއިވަރު އޮތްގޮތެވެ. މިއަހަރުގެ ފަހުކޮޅުގައި އޮންނަރިޔާސީ އިންތިޚާބުގައި ބަދަލެއް ނާންނާނެކަމުގެ ޔަގީންކަން އެބޭފުޅުންގެ ހިތްތަކުގައި ވަޅުޖަހާފައި އޮތްވަރު މިއިނގެނީއެވެ. ބޭރުގައުމުތަކަށް ސަފީރުން އައްޔަން ކުރުމަކީ، ވަރަށް ބޮޑުގައުމީ މައްސަލައެކެވެ. މުޅި ރައްޔިތުންނާގުޅި، ލާމެހިފައިވާ، ރައްޔިތުންގެ މަސްލަހަތާ ސީދާކޮށް ގުޅިފައި އޮންނަ، ޢަމުދުން ދައުލަތަށް ޚާއްސަ ކުރެވިފައި އޮންނަން ޖެހޭނެ ވަރަށް މުހިންމު ކަމެކެވެ. ހަމައެކަނި ސަރުކާރާހަމައިން، ހުއްދަދެވޭ ވަރަށްވުރެ މާފުޅާކޮށް އޮންނަންޖެހޭ ކަމެކެވެ.
ދިވެހި ރާއްޖޭގެ މުޅިސިޔާސީ ހަޔާތުގައިވެސް، ސުމުއްވުލް އަމީރު މުހަންމަދު އަމީން ދޮށިމޭނާ ކިލެގެފާނު އަމިއްލަފުޅަށް އުފެއްދެވި ސިޔާސީޕާޓީ ކަމުގައިވާ “މުތަގައްދިމުޕާޓީ” އަށްފަހު، ދިވެހި ޖައްވަށް ނޭވާލި ހަގީގީ ސިޔާސީޕާޓީއަކީ، “މޯލްޑިވިއަން ޑިމޮކްރަޓިކް ޕާޓީ” (އެމްޑީޕީ) އެވެ. މިކަން ހަގީގަތަކަށް ހެދުނީ، އެއްވެސް ޝައްކެއް ވަސްވާހެއްނެތް ގޮތުގައި އެތައްދިވެހި ދަރީންނެއްގެ ގުރުބާނީތަކާއި މިންނަތް މަސައްކަތުންނެވެ. ޒަމާންތަކެއް ވަންދެން ވެރިކަމުގެ އަމިއްލަބާރާއި ނުފޫޒު ދެމެހެއްޓުމުގެ ބޭނުމުގައި ވަރުގަދަކޮށް ފައިއޮތް ސިފައިންގެ ވަހުޝީ އަނިޔާތަކުގައި ކެތްކޮށްގެންނެވެ. އަދި ރާއްޖެއާއި ރާއްޖޭންބޭރުގައި ކުރެވުނު، އަގުހުރި ތާރީޚީ، މަސައްކަތް ތަކެއްގެ މީރުމޭވާއިންނެވެ. މުޅިއިސްލާހީ ހަރަކާތަށް ބަލާއިރު، އެންމެއަގުބޮޑީ ލޮބުވެތި ދިވެހި ފަސްގަނޑުގައި ތިބެގެން ދެވުނު ގުރުބާނީތަކެވެ. ކަތިލެވުނު ކަތިލެވުންތަކެވެ. މަރުވެޝަހީދުވެ ދިޔަ ފުރާނަތަކެވެ. އިސްތިބްދާދީ ވެރިކަމުގެ ބާރުތަކުން އޮހުރުވާލި ލެޔާއި ދުވަސްދުއްވާލި އެތައްދިވެހި ދަރީންނެއްގެ ޖިސްމުތަކެވެ. ދާއިމަށް އަނިޔާގައި އުޅެންޖެހިފައިވާ ހަށިތަކެވެ. މުޅިއުމުރަށް ތަދާއި ވޭނުގައި އަނިޔާތައް އުފުލަން ޖެހިފައިވާ ގުނަވަންތަކާއި މައިބަދަތަކެވެ. މުޅިއުމުރަށް މޮޔަކޮށްލާފައިވާ ސިކުނޑިތަކުގެ އަހުލު ވެރީންނެވެ. ޖަލަށްލާފައި ނެރޭއިރުބައެއް މީހުންތިބެނީ މޮޔަވެފައެވެ. ރައްޔިތުންގެ މަޖިލިސް ތެރޭގަޔާއި ރައްޔިތުންގެ ޚާއްސަމަޖިލިސް ތެރޭގަޔާއި މިދެމަޖިލީހުން ބޭރުގައި އެހެނިހެން ފޯރަމް ތަކުގައި އަޑުއުފުލާއި ގޮވާލެވުނު ހައްގުބަސް ތަކެވެ. ދޫދިނުމެއްނެތި އެއްވާނެއްގައި ޒަމާނާއެއްގޮތަށް ކުރިއަރާފައިވާ އިސްތިބްދާދީ ސަރުކާރުގެ ޒާތްޒާތުގެ އަނިޔާވެރިކަމާ ކުރިމަތިލާންކެރި، ދޫނިދޫކުޑަ ގޮޅިތަކުގެ އަނދިރީގައި ތިބެގެން ދިވެހިދަރިން ދީފައިވާ އަގުހުރި ގުރުބާނީތައް ނުދެވުނުނަމަ، ބޭރުގައި އަރުވާލެވިގެން ތިބިމަދު ލީޑަރުންކޮޅަށް، އަދި ބައިނަލްއަގްވާމީ މުޖްތަމައުން ކުރާނެ، އަދި ކުރެވޭނެ ކަމެއް އޮތީސްތޯއެވެ؟ ނުއޮންނާނެ ކަން ކަށަވަރެވެ!
ނޯޓް: މިމަޒްމޫނަކީ، ސިޔާސީ ފިކުރުހުންނަ ޒުވާން ކިޔަވާކުދިން ތަކުރާރުކޮށް ކިޔާއި ރައްޖޭގެ ސިޔާސީ މަސްރަހު އެދުވަސްވަރު އޮތްގޮތް ދެނެގަނެ ދިރާސާކޮށް ލުމަށް ވަރަށް ރަނގަޅު ފިލާވަޅު ތަކެކެވެ.
އާދެ! ލޮބުވެތި ދިވެހި ރައްޔިތުންނޭވެ! އަދި ލޮބުވެތި ޒުވާން ކިޔަވާ ކުދިންނޭވެ! ރާއްޖޭގެ ސިޔާސީ މަސްރަހަށް ވިންނާވަޑައި ގަންނަވާށެވެ! ގައުމާމެދު ސިޔާސީފިކުރު ކުރުމަކީ، މުހިންމު ކަމެކެވެ. ވަރަށް ބޭނުންތެރި ކަމެކެވެ. ފަހެ، ދަންނާށެވެ! ދިވެހި ރާއްޖޭގައި ދެވަނައަށް ރަޖިސްޓްރީ ކުރެވުނު ސިޔާސީޕާޓީ ކަމުގައިވާ، “ދިވެހި ރައްޔިތުންގެ ޕާޓީ” (ޑީއާރުޕީ) ގެ ފުރަތަމަ ގައުމީ ޖަލްސާ، ކޮންގްރެސް ހުޅުވައި ދެއްވުމުގެ ރަސްމިއްޔާތުގެ ރިޔާސަތުގައި އެނައުސްމަންޓަކާ އެކު، ވަރުގަދަ އަތްތިލަ ބަނޑިއަކުން ވެޑުވީ، ދައުލަތުގެ މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގެ މިނިސްޓަރ އޮނަރަބްލް އިސްމާޢީލް ޝަފީޢުއެވެ. ޑީއާރުޕީގެ ވަގުތީ ރައީސެއްގެ ހައިސިއްޔަތު ކޮންމެވެސް ގޮތަކަށް އެމަނިކުފާނަށް އެރުވިގެން ދިޔައީއެވެ. މިއީ އެއްވެސް ޝައްކެއް ވަސްވާހެއް ނެތްގޮތުގައި ރައީސް މައުމޫނު ނިންމެވި ނިންމެވުމެއްކަން ކަށަވަރެވެ. މިރަސްމިއްޔާތުގައި މިކަން ހަމަޖެހިގެން ދިޔައީ، ވިދާޅުވި ވިދާޅުވުމާ އެއްގޮތަށް ޝަފީއުގެ ނަންފުޅު އިއްވެވުމުން، އިންތިޚާބުވެ ނިމިއްޖެކަން މެންބަރުންގެ ހޫނުގަދަ އަތްތިލަބަޑީގެ އަޑުފަށްގަނޑު މުޅިހޯލުތެރެއަށް ގުގުމާލުމާ އެކުގައެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ ދަށުން، ސިޔާސީޕާޓީ އުފެއްދުމާ ބެހޭ ޚާއްސަގާނޫނެއް ފާސްކޮށް އަދި ތަސްދީގު ކުރެވިފައި ނެތަސް، “ސިޔާސީޕާޓީ ގަވާއިދު 2005″ ސަރުކާރުން ނެރުއްވައި، އަމަލުކުރަން ފެއްޓެވި ހިސާބުން، ރާއްޖޭގައި ސިޔާސީޕާޓީ އުފައްދައި ހިންގުމުގެ ގާނޫނީބާރު ލިބުނީއެވެ.
އާދެ! މިހައްގު ލިބިގެންދަނީ، ގާނޫނު އަސާސީގެ 42 ވަނަ މާއްދާއިން ލިބިދޭބާރުގެ ދަށުން، އެކަށައަޅާ ގަރާރެއްގެ މަތިންނެވެ. ފަހެ، 42 ވަނަ މާއްދާއަކީ، ރައީސުލް ޖުމްހޫރިއްޔާއަށް ލިބިފައިވާ ބާރުތަކާއި ރައީސުލް ޖުމްހޫރިއްޔާ ކުރަންޖެހޭ ކަންތައްތައް ބަޔާންކުރާ، ފުދޭވަރަކަށް ދިގު މާއްދާއެކެވެ. މިމާއްދާގައި (ހ) އިން ފެށިގެން (ވ) އާ ހަމައަށް 8 އަކުރުގައި އެތައް ކަންތައްތަކެއް ރައީސުލް ޖުމްހޫރިއްޔާ އަށް ހުއްދަކުރައްވައި ބަޔާންކުރެވިފައި ވެއެވެ. ފަހެ، މިމާއްދާއިން ރައީސުލް ޖުމްހޫރިއްޔާ އަށް ލިބިދޭބާރުގެ ދަށުން، އެމަނިކުފާނަށް ދިވެހި ރާއްޖޭގައި ސިޔާސީޕާޓީތައް އުފައްދައި ވުޖޫދަށް ގެނެސް ހިންގުމަށް މަގުފަހިކޮށް ދިނުމަށް މަޖްބޫރުވީ ހިނދު، ވަޒީރުންގެ މަޖިލީހުގެ މަޝްވަރާއާއި ލަފާގެމަތިން، އެކަށަހަޅުއްވައި ނެރުއްވި، ނަންބަރ: 95/2005 ގަރާރުގެ ދަށުންނެވެ. މިގަރާރުގެ ބައެއްގެ ގޮތުގައި ހިމަނާފައިވާ، “ސިޔާސީ ޕާޓީގެ ގަވާއިދު 2005″ ހިންގުމަށް، މިނިސްޓްރީ އޮފް ހޯމްއެފެއާޒަށް އަމުރުކުރެއްވި ހިނދު، އެހައްގު ފުރިހަމައަށް ދިވެހިންނަށް ލިބުނީއެވެ. މިގަރާރަށް ކިޔަނީ، “ސިޔާސީ ޕާޓީގެ ގަވާއިދާބެހޭ ރައީސުލް ޖުމްހޫރިއްޔާގެ ގަރާރު” މިހެންނެވެ. އިސްތިބްދާދީ ވެރިކަމެއްގައި ފުރަތަމަ ފަހަރަށް ސިޔާސީޕާޓީ އެއްގެ ފެރުން ވުޖޫދަށް ގެނެވުނީ، މިގޮތަށެވެ.
އާދެ! ދިވެހިދައުލަތުގެ ބޮޑުމަޖިލިސް ކަމުގައިވާ ދިވެހި ރާއްޖޭގެ ރައްޔިތުންގެ ޚާއްސަ މަޖިލިސް އެއްކުރެވޭނީ، އެމަޖިލިސް އެއްކުރަން ބޭނުންވާކަމަށް ރައީސުލް ޖުމްހޫރިއްޔާއަށް ފެނިއްޖެ ހިނދެއްގަޔާއި ރައްޔިތުންގެ މަޖިލީހުން ރައްޔިތުންގެ ޚާއްސަ މަޖިލިސް އެއްކުރުމަށް ފާސްކޮށްފި ހިނދެއްގައެވެ. މިދެ ދަނޑިވަޅުގައި ވެސް މަޖިލިސް އެކުލަވާލުމަށް އަންގާނީ، ރައީސުލް ޖުމްހޫރިއްޔާއެވެ.
ދިވެހި ރާއްޖޭގެ ޖުމްހޫރިއްޔާގެ ގާނޫނު އަސާސީގައި ވާގޮތުގެ މަތިން، ބޮޑުމަޖިލިސް އެކުލަވާލެވޭނީ، މިދެގޮތުންކުރެ ގޮތަކުން އެކަންޏެވެ. ރޯގާ ޖަރާސީމަކީ، ފުރާނަހުންނަ ތަކެތީގަޔާއި ފުރާނަ ނުހުންނަ ތަކެތީގައި އަށަގަންނަ، އެކަތިން އަނެކައްޗަށް ބަދަލުވުމުގެ ގާބިލުކަން ލިބިފައިވާ، އިންސާނާގެ ހަމަލޮލަށް ނުފެންނަ ވަރަށް ކުޅަދާނަކަން ލިބިފައިވާ، ކޮންމެވެސް ބާވަތެއްގެ ވިހައެއް އުފުލާ އެއްޗެކެވެ. މީގެ ހެއްކަކީ، ކޮންޕިއުޓަރ ފަދަ ތަކެތީގެ ހާޑްވެއަރގައި ޖަރާސީމު އަށަގަތުމެވެ. އަދި ހިކި ލަކުޑިފަދަ ތަކެތީގައި ޖަރާސީމު އަށަގަތުމެވެ. ސައިންސް ވެރިން އެންމެ ކަންބޮޑުވަނީ، އެއްވަށްތަރުން އަނެއް ވަށްތަރަށް ބަދަލުވެ ގަންނަގޮތާ މެދުގައެވެ. ދޫނިސޫފާސޫފިން އިންސާނުން ނަށެވެ. ޖަނަވާރުން އުފެދި އިންސާނުން ނަށެވެ. އަދި އިންސާނީ ނައުޢުން ޖަމާދާތަށެވެ. އަދި މިހާތަނަށް މަޖިލިސް ރޯގާ އުފަންވެ އަށަގެންފައިވަނީ ހަމައެކަނި، ދިވެހި ރާއްޖޭގެ ބޮޑު މަޖިލީހުގައެވެ. އާދެ! ރައްޔިތުންގެ ޚާއްސަ މަޖިލީހުގައެވެ.
ރައްޔިތުންގެ މަޖިލިސް އެކުލެވިގެންވާ ގޮތް ގާނޫނު އަސާސީގައި ލިއުމަށްޓަކައި ބޮޑުމަޖިލީހުގައި ކުރެވެމުން ދިޔަ ދިގުލީ ބަހުސް ނިމި ވޯޓަށް އެހުން އޮތީ، 20 ނޮވެމްބަރ 2006 ވީ ހޯމަ ދުވަހު އޮތް އެމަޖިލީހުގެ 123 ވަނަ ބައްދަލުވުމު ގައެވެ. މި ބަހުސްގައި އެންމެ ހޫނުގަދަކޮށް ބަހުސްކުރެވުނު މައުޟޫއަކަށް ވެފައި އޮތީ، ރައްޔިތުންގެ މަޖިލީހުގައި އަންހެން ބޭފުޅުންނަށް ޚާއްޞަ ކޯޓާއެއްގެ ދަށުން ވަކި ޢަދަދަކަށް، ވަކި މުއްދަތަކަށް ޚާއްޞަ ކުރެވޭ ގޮނޑިތަކެއް ބެހެއްޓުމަށެވެ. މިކަމުގައި އިސްކޮށް އުޅުއްވީ ދިވެހި ރައްޔިތުންގެ ޕާޓީ (ޑީއާރުޕީ) ގެ ވަރަށް އިސް އަންހެން ދެބޭފުޅުން ކަމުގައިވާ މުލަކު އަތޮޅު މެންބަރު އަލްފާޟިލާ އަނީސާ އަހްމަދާއި ރައީސުލް ޖުމުހޫރިއްޔާގެ މެންބަރު އަލްއުސްތާޛާ ޢައިޝަތު އާޒިމާ ޝުކޫރެވެ. އާދެ! “ދަނގަޑުއަންހެނާ” އެވެ. މި ދެބޭފުޅުންގެ ހުށަހެޅުއްވުންތައް ބަހުސްގެ އެކި ހިސާބުގައި އެކިގޮތަށް ބަދަލުވަމުން ދިޔަތަން ފެނުނެވެ.
އޭ! ލޮބުވެތި ރައްޔިތުންނޭވެ! ޝައްކެއްނެތް ގޮތުގައި ޚިޔާނަތްތެރިންނަކީ، ބޮޑެތި މުޖްރިމުންނެވެ. ހިފާހައްޔަރުކޮށް އެކަހެރިކޮށް ބައިތިއްބައިގެން ތަހުގީގު ހިންގަންޖެހޭ ބައެކެވެ. އެމީހުންގެ އެތެރެފުށް ރައްޔިތުންނަށް ފާޅުވާންޖެހޭ ބައެކެވެ. އިންސާފުގެ ކުރިމައްޗަށް ގެންނަންޖެހޭ ބައެކެވެ. އަދި އަމުދުން ދައުލަތަށް ޚިޔާނަތްތެރި ވެފައިވާ މީހުންނާމެދު، ގާނޫނީފިޔަވަޅު އެޅުމަކީ، ސަރުކާރުން ކޮންމެހެން ވެސް ކުރަންޖެހޭ މަޖުބޫރުކަމެކެވެ. އެފަދަ އެއްވެސް މުޖްރިމަކު މިނިވަންކަން މަތީގައި ދޫކޮށްލާފައި ހުރެގެން ނުވާނެއެވެ. ރައްޔިތުންގެ ޝަރީއަތް ކަމުގައިވާ ގާނޫނު އަސާސީ އެއްފަރާތްކޮށް، ރައްޔިތުންގެ މިލްކުމުދަލަށް އެގޮތްމިގޮތް ހަދާފައިވާ، އަދި ތިރީސްއަހަރު ވަންދެން އަމިއްލަ އެދުމައިގެން ސަރުކާރުގައި ބަގުޑިބެއްދި ޚުދުމުޚްތާރު ވެރިން، ރީތިހާގޮތްގޮތަށް ގައުމުގެ ސިޔާސަތާ ކުޅެން ރައްޔިތުންގެ ފައިސާއިން މުސާރަދީފައި ބައިތިއްބައިގެން ނުވާނެއެވެ. މިކަމަކީ، މިހާތަނަށް ޑިމޮކްރަސީގެ ނަމުގައި ކުރެވުނު އެންމެނުބައި މުޑުދާރު ކަންތަކެވެ. މިބީދައިން މިނިވަންކޮށް ދޫކޮށްލާފައި ބައިތިއްބަން ޖެހޭނީ، ބާރުތައް ވަކިވެފައި އޮންނަ ގާނޫނުއަސާސީ އެއްގެދަށުން ވެރިކަން ކޮށްފައިވާ މީހުންނެވެ. ރާއްޖޭގެ ކުރީގެ ރައީސުލް ޖުމްހޫރިއްޔާ އަލްއުސްތާޒު މައުމޫނު އަބްދުލް ގައްޔޫމަކީ، އިންސާފުގެ ކުރިމައްޗަށް ހާޒިރުކުރަން ޖެހޭމީހެކެވެ.
އޭ! ރައްޔިތުންނޭވެ! ދަންނާށެވެ! މިވާނުވާ އޮޅުން ފިލުވާށެވެ! ކޮންމެގައުމެއްގައި ވެސް ހަރުދަނާ ސަރުކާރެއް އޮތުމަކީ، އެންމެ ބޭނުންތެރިކަމެވެ. ރައްޔިތުންގެ އެންމެބޮޑު އެދުމެވެ. ރައްޔިތުންގެ ވިންދާއި ކެކުޅެމުންދާ އިހްސާސްތަކާ އެއްގޮތަށް ސަރުކާރު ހަރުދަނާ ކުރަންޖެހޭނެއެވެ. ޒިންމާދާރު ވާންޖެހޭނެއެވެ. އެކަން ފުރިހަމަ ނުވާ ސަރުކާރެއްނަމަ ވީހާއަވަހަށް އެކަން ފުރިހަމަ ކުރަން ޖެހޭނެއެވެ. އަދި ދައުލަތުގެ ބަންޑާރަނައިބު އެކަމާ ޒިންމާވާން ޖެހޭނެއެވެ. ރައްޔިތުންގެ ތެޅެމުންދާ ވިންދާއި ކެކުޅެމުންދާ އިހްސާސްތަކަށް ހަމަހިމޭންކަމާއި ގަރާރުވުން ގެނެސް ނުދެވޭ ސަރުކާރަކީ، ފުރިހަމަނުވާ ސަރުކާރެކެވެ. ޅަފަތުގައިއޮތް ނުކުޅެދޭ ސަރުކާރެކެވެ. ކަސިޔާރު ކަމެއްގެ ތެރޭގައި އިސްތިބްދާދައި ދިމާއަށް ދަތުރުކުރާ ސަރުކާރެކެވެ. ޑިކްޓޭޓަރޝިޕަށް ލެނބޭ ސަރުކާރެކެވެ.
ފަހެ ދަންނާށެވެ! ސަރުކާރުން ސިޔާސީ ކަންކަމުގައި ރައްޔިތުން ވެބޫހައްދައިގެން ނުވާނެއެވެ. އަދި އެބީދައިން ސިޔާސީ އެއްވެސްކަމެއްގެ ހަގީގަތް އޮޅުވާލައިގެން ނުވާނެއެވެ. އެކަން ކުރެވޭނަމަ އެއީ ވަރަށްބޮޑު ގޯހެކެވެ. ރައްޔިތުންނަށް ދެވޭ، އަނިޔާއެކެވެ. ފަހަކަށް އައިސް ރާއްޖޭގެ ސިޔާސީ މަސްރަހުން ތިލަވި، އެންމެނާޒުކު ސިޔާސީ ކަމަކީ، ދުނިޔެއަށް ވިދާލި ޖޯސެފްޓީޓޯގެ ބާރުގަދަ ސޯސިއަލިސްޓް ފެޑަރަލް ރިޕަބްލިކް އޮފް ޔޫގޯސްލާވިޔާ ރޫޅިކުދިކުދި ވެގެންގޮސް، 2008 ފެބްރުއަރީ 17 ގައި އަމިއްލަ ދައުލަތެއްގޮތުގައި މިނިވަންކަން އިއުލާނުކުރި ރިޕަބްލިކް އޮފް ކޮސޯވޯ، ދިވެހި ރާއްޖެއިން މިނިވަން ދައުލަތެއް ގޮތުގައި ގަބޫލުކުރީ، މިހާރުގެ ސަރުކާރުން ބަޔަކު، ރިޝްވަތު ހިފައިގެން ކަމަށް އެރިއަޑެވެ. ސާބިޔާއިން ވަކިވެ، ކޮސޯވޯގެ މިނިވަންކަން، 120 މެމްބަރުން ހިމެނޭ ކޮސޯވޯގެ ރައްޔިތުންގެ މަޖިލީހުގެ (ކޮންސްޓިޓިއުޝަނަލް ފްރޭމްވަރކް ފޯދަ ޕްރޮވިޝަނަލް ސެލްފްގަވަރމެންޓް އޮފް ކޮސޯވޯ) 100 ވޯޓުގެ އަޣްލަބިއްޔަތުން ފާސްކޮށް، އިއުލާނު ކުރުމާގުޅިގެން ދާދިއަވަހަށް ޔޫއެންގައި ހިމެނޭ، 56 ގައުމަކުން، ކޮސޯވޯގެ މިނިވަންކަން ގަބޫލުކޮށްފިއެވެ. އޭގެތެރޭގައި ޔޫއެސް، ޖާމަނީ، އިޓަލީ، ފްރާންސް، ޔޫކޭ، އަދި ރިޕަބްލިކް އޮފް ޗައިނާ (ޓައިވާން) ހިމެނެއެވެ. މިކަންހިނގީ، ރަޝިޔާ އާއި ޕީޕަލްސް ރިޕަބްލިކް އޮފް ޗައިނާ ވަރަށް ފާޅުގައި ދެކޮޅުހަދަމުން ދަނިކޮށެވެ.
ފަހެ ދަންނާށެވެ! ދިވެހިރައްޔިތުންގެ އެންމެމަތީ “ގެ” ކަމުގައިވާ ރައްޔިތުންގެ މަޖިލީހުގެ ދައުރުންބޭރު ޖަލްސާތަކެއް ބާއްވައިގެން ހާސިލުކުރެވުނު ނަތީޖާ، ރައްޔިތުންނަށް އެއްގޮތަކަށް ވެސް ނުފެނުނެވެ. ޖެހުނީ ހަމަޖެހުނު ތަނުގައެވެ. ކުރިފައިދާއެއް ނެތެވެ. ބޭކާރު ވާހަކަތަކެއް ދެކެވިއްޖެއެވެ. އަރާރުންތަކެއް ވެއްޖެއެވެ. ބައެއް ސިޔާސީ މީހުންގެ އިހުސާސްތަކަށް ވަގުތީގޮތުން ފިނިކަމެއް ލިބިއްޖެއެވެ. ޖުމްލަކޮށް ރައްޔިތުންނަށް ހާސިލުވި އެއްވެސް އެއްޗެއް ފެންނާކަށް ނެތެވެ. ފަހެ ޗުއްޓީގެ ދުވަސްވަރު ޗުއްޓީއަށް ހައްދަވާފައި ދައުރުފެއްޓެވި ނަމަވެސް، ހާސިލުވީހީ ހަމައެއް ނަތީޖާއެއްކަން ކަށަވަރެވެ. މުޅިދުނިޔޭގެ އިގްތިސާދަށާއި ދިވެހިރާއްޖޭގެ އިގްތިސާދަށް ދިމާވެފައިވާ ދަތިތަކާ ބެހޭގޮތުން، އިއްޒަތްތެރި އަމިއްލަ މެންބަރެއްގެ ހީވާގި މަސައްކަތް ޕުޅުން، ދާދިފަހުން މަޖިލީހުގެ ތަޅުމުގައިވެސް ސީދާކޮށް މިބަހުސް ކުރެވިއްޖެއެވެ. މިހާތަނަށް އިވިގެންދިޔައީ ހަމަހުސް އަނގަތެޅުން ތަކެކެވެ. ކުރެވުނުކަމެއް، އެޅުނުފިޔަވަޅެއް އަދިނެތެވެ. އިގްތިސާދީ މާހިރުންގެ ކޮމެޓީއެއް އުފެދިދާނެހެން ހިޔެއްނުވެއެވެ. ފަހެ، ދުނިޔޭގެ އިގްތިސާދަށް އަންނަމުންދާ ބަދަލާއެކު، ރާއްޖޭގެ އިގްތިސާދު އޮތީވަރަށް ޚުތޫރަތްތެރި، އަދި އެހާމެނާޒުކު އަނދަވަޅެއްގެ ތެރޭގައެވެ. ކިރިޔަކިރިޔާ ބަނގުރޫޓުނުވާ ހިސާބުގައެވެ.
ފަހެ، ދަންނާށެވެ! އެއްވެސް ޝައްކެއްނެތެވެ! 2008 ނޮވެމްބަރ 11 ވީ އަންގާރަދުވަހުން ފެށިގެން ހިނގަމުންދަނީ، ރައީސް ނަޝީދުގެ ސަރުކާރެވެ. މުޅިންއާ ސަރުކާރެކެވެ. އެމްޑީޕީ އިއްތިހާދުން އުފައްދާފައިވާ ސަރުކާރެވެ. މިއިއްތިހާދާއެކު އިތުރުފަސް ސިޔާސީ ޕާޓީއެއް ގުޅިފައިވެއެވެ. ނޮވެމްބަރ 25 އަށް އާސަރުކާރަށް ބަރާބަރު 15 ދުވަސްވާނެއެވެ. އަޅުގަނޑު މިމަޒްމޫނުގައި އަލިއަޅުވާލަން ބޭނުންވަނީ، އާސަރުކާރުގެ ފުރަތަމަ 7 ދުވަހަށެވެ. އަޅުގަނޑު ހިމެނިގެންވާ ރައްޔިތުންގެ އާސަރުކާރަށް ހިތުގެއަޑިން މަރުހަބާ ދަންނަވަމެވެ. ލޮބުވެތި ދިވެހި ރައްޔިތުންނަށް ހިތުގެ އެންމެއަޑިން މަރުހަބާ ދަންނަވަމެވެ. އާސަރުކާރެއްގެ ފުރަތަމަ 7 ދުވަހަކީ، ވަރަށް މުހިންމު ދުވަސްކޮޅެކެވެ. ނާޒުކު ދުވަސްކޮޅެކެވެ. އެންމެ ޅަފަތުގެ ދުވަސްކޮޅެވެ. އަލަށް ދަރިޔަކު ލިބުމުންވެސް ފުރަތަމަ 7 ދުވަހުގެ ތެރޭގައި ކުރަންޖެހޭ މުހިންމު ކަންތައްތަކެއް އިސްލާމް ދީނުގައި އަމުރުކުރެވިފައި އެބަހުއްޓެވެ. އަދި ދިވެހިންގެ ޒަމާންވީ ސަގާފަތުގައި އަށަގަނެފައި އެބަހުއްޓެވެ. އެއީކޮންމެހެން ވެސް ކުރަންޖެހޭ ކަންތަކެވެ. ފިތުރަތެވެ. ސުންނަތެވެ. ރައްޔިތުންގެ ވިންދާ ގުޅިފައިވާ ކަންތަކެވެ. އެކަންތައްތައް އޭގެވަގުތުގައި ކުރެވެމުންދާތަން ނުފެނިއްޖެނަމަ، ހިތްހަމަނުޖެހޭނެ އެތައްބަޔަކު ތިބޭނެކަން ކަށަވަރެވެ. އެއީ އެކަންވާނެ ގޮތެވެ.
ޝައްކެއް ވަސްވާހެއްނެތެވެ! ހަމަކަށަވަރުން ހައްގު އަތުވެއްޖެއެވެ. މިއަދަކީ ނަސްރުގެ ދުވަހެވެ. ﷲ ނަސްރާއި ފަތަހަ ދެއްވައި ފިއެވެ. މީސްތަކުން ބައިބަޔަށް އުފާކުރަން ފަށައިފިއެވެ. މިމަހު، (ނޮވެމްބަރ) އެގާރަވަނަ ދުވަހު ބޮޑުއީދު އަންނަނީއެވެ. އުފަލުން ފުރިގެންނެވެ. ނަސްރާއި ކާމިޔާބުން ފުރިގެންނެވެ. ދުވަސްވީ އަނިޔާވެރި ސަރުކާރަކުން، ތާހިރު ޑިމޮކްރަސީއަށް ބަދަލުވަނީއެވެ. އަނެއް ރާއްޖެއަށް ވާސިލުވަނީއެވެ. ވަތަންއެދޭގޮތަށެވެ. ފަހެ، މިހިނދު ހައްދަވައި ބޮޑުކުރެއްވި ﷲ އަށް ހަމްދުސަނާއިން ތަސްބީހަ، ވިދާޅުވުމަށް ދަންނަވަމެވެ. ﷲ އަށް ޝުކުރުވެރި ވުމަށް ހަދާންކޮށް ދެމެވެ. ރާއްޖެއިން ބާތިލު ނައްތާލުމަށް ގޮވާލަމެވެ. ވެވަޑައިގެންނެވި ވައުދުތައް އެންމެ ފުރިހަމަގޮތުގައި ފުއްދައި ދެއްވުމަކީ، ލާޒިމުޝަރުތެކެވެ. ފަހެ، މިލިބުނު އުފާވެރިކަމުގެ ހިތްހަމަޖެހުން ލިބިގަންނަމުން، ދިވެހިންނަށް ހައްގުމަގަށް ގޮވާލުމުގައި ދެމިއޮތް، އިސްލާހީ ހަރަކާތް ހަދާނަށް ގެންނަމެވެ. 1980 ވަނައަހަރުން ފެށިގެން މިހާތަނަށް ކުރެވުނު ހުރިހާ މަސައްކަތެއް ހަދާން ކުރަމެވެ. އިސްލާހީ ހަރަކާރުގެ ފަހުބައިގާ މަޝްހޫރު ވެގެންދިޔަ، “ސަންދާނު” މަޖައްލާ ހަދާނަށް ގެންނަމެވެ. އަދި އެމަޖައްލާގެ ފަހަތުގައި ތިއްބެވި ކެރޭ، ހީވާގި ހަތަރު ފަހުލަވާނުންގެ ޖިހާދު ހަދާނަށް ގެންނަމެވެ. ސަންދާނު ޒަކީއާއި ސަންދާނު އިބްރާހީމް ހަރަކާރްތެރި ވަމުން ގެންދެވީ ރާއްޖޭން ބޭރުގައެވެ. މުސްތަގުބަލުގައި އެއީ މިރާއްޖޭގެ ސަފީރުންނެވެ. ޒަކީއަށް މެލޭޝިޔާގެ ސަފީރުކަން ހައްގެވެ. އިބްރާހީމަށް ޖެނީވާގެ ސަފީރުކަން ހައްގުވާނެއެވެ. އަދުގެ މުންތަޚަބު ރައީސް ނަޝީދު މިދެމުޖާހިދުންގެ މަސައްކަތުގެ އަގު ވަޒަންކުރައްވާން ޖެހޭނެއެވެ.
ދަންނާށެވެ! ރައްޔިތުންގެ ވެރިކަމެއްގައި އެންމެ އިސް ބާރަކީ ޢަދުލުއިންސާފުގެ ބާރެވެ. ޢަދުލު އިންސާފުގެ ބާރަކީ ވަކި މުސްތަޤިއްލު ބާރަކަށް ނުވެއްޖެނަމަ، މުޅި ސަރުކާރުގެ ބާރުގެއްލި ގަދަ މީހާއަށް ގަދަ ވެގަނެވުނީއެވެ. ބަލިމީހާ ނިކަމެތިވީއެވެ. ހައްގުތައް ގެއްލުނީއެވެ. މިއީ ރޫޅުމާއި ހަލާކުގެ ފެށުމެވެ. މިހިސާބުން ޢަދުލު އިންސާފު ގެއްލި ރައްޔިތުންގެ ޙައްޤުތައް ފުޑުފުޑުވީއެވެ. ބަރުބާދުވީއެވެ. މާސިންގާ ކަނޑުގެ އާދަކާދައާއި އުސޫލުތަކާ އެއްގޮތަށް، ރައްޔިތުންގެ ސަރުކާރުގެ ހަމަތަކާއި އުސޫލުތައް ބަދަލުވީއެވެ. ފަހެ، މިއީ ރައްޔިތުން ކާމިޔާބުވުމަށް އޮތް މަގެއްނޫނެވެ. ހަމަތަކެއް ނޫނެވެ. ފަހެ، ދަންނާށެވެ! އިންސާނާގެ ކާމިޔާބަކީ، ﷲ އެކަލާނގެ ރަސޫލާއަށާއި މުޅިއުންމަތަށް ވިދާޅުވެދެއް ވުމަށް އަމުރުކުރެއްވި މާތް އަމާޒެވެ. އަދި މިއީ، ދިރިތިބުމުގެ މާތް މަގްސަދެވެ. ފަހެ، ﷲ ޢަމުރު ކުރެއްވިއެވެ. ކަލޭގެފާނު ވިދާޅުވާށެވެ! ތިމަންކަލޭގެފާނުގެ ނަމާދާއި އެހެނިހެން އަޅުކަމާއި ތިމަން ކަލޭގެފާނުގެ ދިރިހުރުމާއި، ތިމަން ކަލޭގެފާނުގެ އަވަހާރަވުން ވަނީ، ޢާލަމްތަކުގެ ވެރި ﷲއަށެވެ. އަލްއަންޢާމް ސޫރަތުގެ 162 ވަނަ އާޔަތާއި އަދި ޖެހިގެން އޮތްއާޔަތުގެ ތަފްޞީލް ބައްލަވާ ލައްވާށެވެ.
އޭ! ލޮބުވެތި ރައްޔިތުންނޭވެ! ދެކެދެނެތިބެ ދަންނާށެވެ! މުސްލިމުންނާ ޒާތީގޮތުންނާއި ރޫޙީގޮތުން އެންމެދެކޮޅުވެރި، ޔާހޫދީންނާއި ނަސާރާއިންގެ ފަސްގަނޑުން އިސްލާމުންނަށް، އިސްލާމުން ގެންގުޅެންވީ ފްރީޑޮމާއި ޑިމޮކްރަސީއާއި އިންސާނީ ހައްގުތައް ތަމްސީލު ކުރުމަށް އަޑީގައި އެމެރިކާގެ ސަރުކާރު އޮވެގެން މުސްލިމް ޖަމާއަތެއް ލައްވާދެމުން ގެންދާ، “މުސްލިމް ޑިމޮކްރޭޓް އޮފްދައިޔާ” އެވޯޑް 2009 ލިބިގެން މިދިޔައީ، ދިވެހިރާއްޖޭގެ ދަރިއަކަށެވެ. ކުޅަދާނަ ޑިޕްލޮމޭޓަކަށެވެ. މީސްތަކުން ތެރޭގައި މަތީފަށަލަ ރީތިކޮށްގެން އުޅެންދަންނަ ފިލޯސަފަރަކަށެވެ. ކުރީގެ އަނިޔާވެރި ޚުދުމުޚްތާރު ސަރުކާރުގަޔާއި ރައްޔިތުން އިސްލާހީ ބަދަލަކަށް އެދި ވެރިކަމަށް ގެނައި ސަރުކާރުގައި ވެސް ޚާރިޖީވަޒީރަކަށް ހުންނެވުމުގެ ނަސީބުވެރިޔަކަށް ވެގެންދިޔަ، ޑޮކްޓަރ އަހްމަދު ޝަހީދަށެވެ. މިޝަޚްޞިއްޔަތުގެ މާޒީއާއި މިހާރުގެ ހާލަތު ދިވެހި ރައްޔިތުން ވަރަށް ރަނގަޅަށް ދަނެއެވެ. އިތުރަށް ކިޔައިދޭކަށް ނުޖެހޭނެއެވެ. އަދި އިތުރަށް ލިޔާކަށްވެސް ނުޖެހޭނެއެވެ. ފުރިހަމަ ކުޅަދާނަ ޑިޕްލޮމޭޓުންނަކީ، ސަމްސަލުގެ ދައުރު ވަރަށް ފުރިހަމަކޮށް ހުރިހާތަނެއްގައި ވެސް އަދާކުރަން ދަންނާނެ ކުޅަދާނަ ބޭފުޅުންނެވެ. އެކަން ދިވެހިންގެ ހިތްތަކުގައި ފުށްވަޅު ނެގިފައި ހުންނާނެކަން ކަށަވަރެވެ. މިއަދު އެހެން ކުލައެއްގެ ޚާރިޖީ ފޭރާމެއްގައި ފެންނަން ހުންނެވިޔަސް ރައްޔިތުންގެ ހިތްތަކުގައި އުފެދިފައި ހުރި، ތުނިޓިޝޫތަކުގެ ފަތްފުށްތަކުގައި އެހަދާންތައް ވަނީ، ކަނޑާނެގި އާވެއާވާގޮތަށް ތާއަބަދަށްޓަކާ ހަރުލާފައެވެ.
ލޮބުވެތި ރައްޔިތުންނޭވެ! ދަންނާށެވެ! ލޯނާއި ހިލޭލޯނާއި އެހީތަކާއި ބޭރަށާއި އެތެރޭގެބައެއް ކަންކަމަށް ގަނޑުކޮށް ނަގުދު ފައިސާޚަރަދު ކުރުމުގެ އިތުރުން ދެންހުރިހުރިހާ ހިސާބުތައް ރައީސުލް ޖުމްހޫރިއްޔާގެ އޮފީހުގައި ވަރަށްރަނގަޅަށް ބެލެހެއްޓިފައި ހުރިކަމަށް އޮޑިޓަރޖެނެރަލްގެ ރިޕޯޓުގައި ވިދާޅުވެފައި ވެއެވެ. ނަގުދުފައިސާގެ ކަންތައް އޮޅުންބޮޅުން ތެރޭގައި ހުރެފައި ދެންހުރިހާ ހިސާބުތަކެއް ފުރިހަމަކޮށް ރަނގަޅަށް ހުރުމުން އެނގެނީ، މިފަދަގޮތަކަށް ދައުލަތުގެ ފައިސާގަނޑުކޮށް ޚަރަދު ކުރެއްވުމަކީ، ރައީސްމައުމޫނު ގަސްދުގައި ކުރައްވާފައިވާ ކަމެއްކަމެވެ. ދައުލަތުގެ ފައިސާއަށް ބޭނުންފުޅުގޮތެއް ހެއްދެވުމުގެ ވިސްނުމުގައި ކުރައްވާފައިވާ ކަމެއްކަމެވެ. ދައުލަތުގެ ފައިސާގައި ނަހަމަގޮތުގައި ޖެހިވަޑައިގެން ނެވުމުގެ ބޭނުމުގައި އަމިއްލަފުޅުބޮޑު ރޭވުމެއްގެދަށުން ކުރައްވާފައިވާ ކަމެއްކަމެވެ. ފަހެ، ކޮންމެހެން ބަލަހައްޓަން ޖެހޭފައިސާގެ މުހިންމު ބައިތަކަށްވަނީ، ވަރަށްބޮޑަށް އިހުމާލު ވެފައެވެ. ގަސްދުގައި އަޅާނުލައްވާފައެވެ. ދައުލަތަށް ޚިޔާނާތްތެރި ވެފައެވެ. ހިސާބުތައް އެއްގޮތަކަށްވެސް ބަލަހައްޓަންޖެހޭ ގޮތަށް ބަލަހައްޓާފައެއް ނެތެވެ. ލިޔެކިޔުންތަކާއި އެގްރީމަންޓުތައް ވެސް ފެންނަ ހިސާބެއްގައި ބަހައްޓާފައެއް ނެތެވެ. ވަނީ ފޮރުވާފައެވެ. ނުވަތަ ނައްތާލާފައެވެ. އެންމެފަހު ވަގުތުގައި އަންދާލީކަމަށް ވެސް ވެދާނެއެވެ. މިއީ ގަސްދުގައި ކޮށްފައިވާ ކަމެއްކަން ޔަގީނެވެ. ބޮޑުވެގެންވާ ޖަރީމާއެކެވެ. ސުވާލުކުރެވެން ޖެހޭނެކަމެކެވެ.
އޭ! ލޮބުވެތި ރައްޔިތުންނޭވެ! ފަހެ، ދަންނާށެވެ! އޮޑިޓަރ ޖެނެރަލްގެ ރިޕޯޓުގައި ސަރުކާރުގެ އިދާރާތަކާއި ވަޒީފާތަކަށް ސިޔާސީގޮތުން ގެންނަބަދަލުތައް ފާހަގަ ކުރައްވާފައި ވެއެވެ. މިގޮތުން ވޭތުވެދިޔަ ތިންއަހަރެއްގެ ތެރޭގައި ވަރަށް ބޮޑެތިބަދަލުތައް ސިޔާސީގޮތުން ގެނެސްފައި އެބަހުއްޓެވެ. މީހުންގެ ގާބިލިއްޔަތަށް ބަލާލުމެއްނެތި ބޮޑެތިމަގާމުތައްދީ އެފަދަ ފަރާތްތަކަށް ވަޒީފާ ދިނުމަށްޓަކައި ސަރުކާރުގެ މުއައްސަސާތައް އަލުން ބަލުން ވުޖޫދަށް ގެނެސް، އުފައްދަވާފައި އެބަހުއްޓެވެ. އެއިދާރާތަކަކީ، ރައްޔިތުންނަށް އެއްވެސް ފައިދާތަކެއްކުރާ ތަންތަނެއްނޫނެވެ. މިއީ އަދި އަލަށްހެދުނު ގާނޫނުއަސާސީގެ ދަށުން ގެނެވުނު ބަދަލުތައް ނުހިމަނާ ޚުދުރައީސް މައުމޫނު ކުރައްވާފައިހުރި ކަންތަކެވެ. މިނިސްޓަރުންނާއި އިސް މަވައްޒަފުން ވަރަށްއަވަސް އަވަހަށް ބަދަލު ކުރެއްވުމާ ގުޅިގެން މުޅިންއާ މުއައްސަސާތައް ވުޖޫދަށްގެނެސް އުފައްދަވާފައި އެބަހުއްޓެވެ.މީގެތެރޭގައި ކޮމިއުނިޓީ އޯގަނައިޒޭޝަން ކައުންސިލާއި ޕަބްލިކް އެންޓަރ ޕްރައިސަސް ކޮމިޝަނާއި ތައުލީމާބެހޭ ގައުމީމަޖިލިސްފަދަ އިދާރާތައް ޚާއްސަކޮށް ފާހަގަ ކުރެވެއެވެ. ފަހެ، މިއިންކޮންމެ އިދާރާއަކީ، ބަލަދު އަރައިގެންއުޅޭ އުމުރުން ދުވަސްވީ މިނސްޓަރުންނާއި ސިޔާސީގޮތުން ބަލަދު އަރައިގެންއުޅޭ އިސްމުވައްޒަފުން ތަކެއް ބަލަހައްޓަން އުފައްދަވާފައިހުރި ބޭކާރު އިދާރާތަކެކެވެ.
ލޮބުވެތި ރައްޔިތުންނޭވެ! ދަންނާށެވެ! ރައީސް މައުމޫނު ރާއްޖެއިން ބޭރަށް ކުރައްވާ ދަތުރުތަކުގެ ޚަރަދުތައް ވެސް ވަރަށް ތަފްސީލުކޮށް ބެލެހެއްޓެން ޖެހޭނެއެވެ. މިފަދަ ދަތުރުތަކުގެ އެންމެހާ ބައިވެރިންގެ އެއާޓިކެޓާއި ހުންނެވުމާއި ފަރިއްކޮޅާއި ދަތުރުގެ ހުރިހާޚަރަދެއް ކުރައްވާފައިވަނީ ރައީސް އޮފީހުންނެވެ. މިގޮތުން ދަތުރުތަކުގެ ބައިވެރިންގެ ތިއްބެވުމަށާއި ފަރިއްކުޅުއް ވުމަށާއި އަދި ދަތުރުގެ އެހެނިހެން ޚަރަދުތައް ކުރުމަށް ބޭނުންވާ ފައިސާ، ނަގުދުފައިސާއިން ގަނޑުކޮށް ބޭރުފައިސާގެ ގޮތުގައި ޑޮލަރުން ނަގަނީ، އެމްއެމްއޭ އިންނެވެ. ދައުލަތުގެ ބޭންކުންނެވެ. މިފައިސާއާ ހަވާލުވަނީ، ފޮރިން އެފެއާޒުން ދަތުރުގައި ބައިވެރިވާ ޗީފްޕްރޮޓޮކޯލެވެ. މީގެން އެންމެ ދަތުރުފުޅަކަށް ވަރަށްގިނަ އަދަދަކަށް ނަގުދުފައިސާ ޑޮލަރުން ނަންގަވައިގެން ކޭޝްފައިސާގެ ގޮތުގައިޚަރަދު ކުރައްވަމުން ގެންދަނީ އެއްވެސް ބަލާލުމެއް ނެތިއެވެ. ހިތަށްއެރިގޮތަކަށެވެ. އެއްވެސް ތަފްސީލު ހިސާބެއް ބެއްލެވުމެއް ނެތިއެވެ. އެއީ ކޭޝްގޮތުގައިނަގާ ފައިސާއެކެވެ. ފަހެ އެހިސާބުން ހިސާބެއް ކިތާބެއްނެތި، އެނިމުނީއެވެ. ދަތުރުގައި އިސްކޮށް ވަޑައިގަންނަވާ ރަސްގެފާނުގެ ދީލަތިކަމުން ދެއްވާއެއްޗެއްގެ ގޮތުގައި ހަމަޖެހެއެވެ.
ފަހެ ދަންނާށެވެ! 2008 އޮގަސްޓް މަހުގެނިޔަލަށް ރައީސް މައުމޫނު ދިހައަތޮޅަށް ޑީއާރުޕީގެ ފަރާތުން ކެންޕޭން ކުރެއްވުމަށް ދަތުރު ކުރައްވާފައިވާ ކަމަށް އޮޑިޓަރޖެނެރަލް ފާހަގަ ކުރައްވާފައި ވެއެވެ. މައްސަލައަކީ، މިދަތުރުތަކަށް ރައީސް އޮފީހުން އެއްވެސް ޚަރަދެއް ކުރައްވާފައި ވާކަމުގެ ލިޔުމެއް ފެންނަން ނެތުމެވެ. އެހެނަސް ދައުލަތުގެ އެހެން މުއައްސަސާ ތަކުން މިދަތުރުތަކަށް ޚަރަދު ހިނގާފައި ވެއެވެ. މިއިން އެއްވެސް ހިސާބެއް ރައީސް އޮފީހުގައި ބެހެއްޓިފައެއް ނުހުރެއެވެ. އެކައުންޓިންއާއި އެކައުންޓަބިލިޓީ އުސޫލަށް ބަލާއިރު މިކަންކުރަން ޖެހޭނެ ގޮތަކީ، ރައީސުލް ޖުމްހޫރިއްޔާއަށް އެހެން އިދާރާތަކުން އަރުވާ ޚިދުމަތްތަކުގެ ޚަރަދުގެ ތަފްސީލް ރައީސުލް ޖުމްހޫރިއްޔާގެ އޮފީހަށްފޮނުވި، އެއޮފީހުގައި އެއްކުރެވިފައި ހުރުމެވެ. ރައީސް މައުމޫނު ރިޔާސީ ކެންޕޭނުގައި އުޅުއްވިއިރު ސަލާމަތީގޮތުން އަރުވަންޖެހޭ ހުރިހާ ޚިދުމަތެއް ދައުލަތުގެ ޚަރަދުގައި ދެވެންޖެހޭނެއެވެ. އެހެނަސް ދައުލަތުގެ ތަކެއްޗާއި ވަސީލަތްތައް ކެންޕޭނުގައި ހިލޭބޭނުން ކުރެވޭގޮތެއް އެއްވެސް ގައުމެއްގައި ހުއްދަކޮށްފައެއް ނޯވެއެވެ.
